Bandaríska fyrirtækið Venue Aerospace vinnur nú að þróun ofurhljóðfrárrar farþegaþotu. Hún á að geta náð níföldum hljóðhraða. Ef þetta gengur allt saman upp þýðir það auðvitað að flugtími á milli fjarlægra staða mun styttast mjög mikið. Til dæmis mun það aðeins taka eina klukkustund að fljúga frá New York til Tókýó.

Flugvélar, sem ná hljóðhraða, eru ekki ný uppfinning. Flestar orustuþotur nútímans ná hljóðhraða en lítið hefur verið um að farþegaflugvélar nái svo miklum hraða.

Concord, sem var tekin í notkun 1976 og var í notkun til 2003, náði tvöföldum hljóðhraða, eða rúmlega 2.400 km/klst. Á velmektardögum Concord var hægt að komast frá Lundúnum til New York á aðeins 3,5 klukkustund. Í dag tekur þetta ferðalag um 7 klukkustundir.

Sovétmenn smíðuðu Tupolev Tu-144 flugvélina sem náði hljóðhraða. Á Vesturlöndum var hún kölluð „Concordski“ því talið var að Rússar hefðu þróað vélina á grunni tækniþekkingar sem þeir stálu frá Vesturlöndum.

Venus Aerospace, sem er ungt fyrirtæki í Texas, beinir sjónum sínum nú að því að þróa ofurhljóðfráa farþegaflugvél. Hún á að heita Stargazer og á að ná allt að níföldum hljóðhraða eða 11.000 km/klst. Engum hefur tekist að smíða flugvél sem nær svo miklum hraða.

Bandaríska X-15 tilraunaflugvélin, sem var smíðuð 1967, náði 6,7 földum hljóðhraða og er hraðskreiðasta flugvélin sem hefur verið smíðuð til þessa.

En Stargazer er ekki að fara að koma á markaðinn alveg á næstunni því löng og mikil þróunarvinna er fram undan.