Alicia Moore, 24 ára íbúi í Orlando í Flórída, á kærur yfir höfði sér eftir að hún skildi börnin sín tvö eftir í bíl á meðan hún fór inn í verslun til að stela. Á meðan hún var að því kviknaði í bílnum. Vegfarendur áttuðu sig á hvað var að gerast og björguðu börnunum úr bílnum.

Sky News segir að Moore hafi skilið börnin eftir í bílnum fyrir utan verslunarmiðstöð um miðjan dag þann 26. maí síðastliðinn. Hún og „óþekktur“ karlmaður hafi farið inn í stórverslun og verið þar í um klukkustund við að stela ýmsum varningi. Á meðan kviknaði í bíl Moore.

Í lögregluskýrslu segir að þegar Moore sá að eldur logaði í bílnum hafi hún „kastað stolna varningnum frá sér“ og hlaupið út úr versluninni.

Bíllinn, Lincoln árgerð 2016, gjöreyðilagðist í eldinum.

Annað barnið hlaut fyrsta stigs brunasár.

Moore á yfir höfði sér ákæru fyrir vanrækslu á börnum og íkveikju, einnig fyrir búðarhnupl og líkamsárás á manneskju eldri en 65 ára.