Það er ekki hægt að útiloka að kórónuveiran, sem veldur COVID-19, hafi sloppið út frá rannsóknarstofu í milljónaborginni Wuhan í Kína.

Þetta sagði George Gao, fyrrum yfirmaður kínversku smitsjúkdómastofnunarinnar, í viðtali við BBC.

Kínversk stjórnvöld hafa fram að þessu vísað öllum kenningum, um að veiran gæti hafa sloppið út frá rannsóknarstofunni, á bug. En Gao, sem gegndi lykilhlutverki í viðbrögðum Kínverja við veirunni, er ekki alveg jafn sannfærður að sögn BBC.

„Mann getur alltaf grunað eitthvað. Þannig eru vísindin. Og það er ekki hægt að útiloka neitt,“ sagði hann í samtali við BBC Radio 4.

Hann sagði einnig að kínversk yfirvöld hafi hugsanlega tekið kenninguna alvarlegar en þau hafa viðurkennt opinberlega. Hann sagði að ýmsar formlegar rannsóknir hafi verið gerðar á málefnum umræddrar rannsóknarstofu en hún hefur árum saman verið notuð við rannsóknir á kórónuveirum.

BBC segir að þetta sé í fyrsta sinn sem það komi fram að rannsókn hafi verið gerð á málefnum rannsóknarstofunnar. Gao sagði einnig að hann hafi „heyrt“ að ekkert grunsamlegt hafi fundist. „Ég held að niðurstaða þeirra hafi verið að þeir fari eftir öllum starfsreglum. Þeir fundu engin mistök,“ sagði hann.