„Staðreyndin er að hinn grunaði faldi sig fyrir allra augum í rúmlega 40 ár.“ Þetta sagði Jim Fryhoff, lögreglustjóri í Ventura County í Kaliforníu, á fréttamannafundi í síðustu viku.

Þar skýrði hann frá handtöku Tony Garcia, sem nú er 68 ára, í síðustu viku.

Garcia er grunaður um að hafa nauðgað og myrt tvær konur í Kaliforníu árið 1981. Þá var Rachel Zendejas, 20 ára, og Lisa Gondek, 21 árs, nauðgað og þær myrtar.

Það voru tveir blaðburðardrengir, 9 og 14 ára, sem fundu lík Zendejas í bílskýli í götunni þar sem hún átti heima. Þetta var þann 18. janúar 1981. Zendejas var einstæð tveggja barna móðir og háskólanemi.

Hún hafði farið út um kvöldið og fengið tvær barnapíur til að gæta dætra sinna. Hún ók þeim heim eftir að hún kom heim. Fryhoff sagði að miðað við ummerki á vettvangi hafi verið ráðist á hana þegar hún steig út úr bílnum sínum eftir að hafa skutlað barnapíunum heim.

Gondek fannst látin þann 12. desember 1981. Hún hafði farið á skemmtistað með vinum sínum og síðan heim. Hún fannst látin í baðkarinu þar.

Lögreglan byrjaði að rannsaka mál þeirra á nýjan leik 2004 þegar tókst að tengja lífsýni úr báðum málum saman. Þetta voru lífsýni úr morðingjanum.

Með nýrri DNA-tækni tókst lögreglunni svo að rekja sig áfram til Garcia.

Hann hafði kennt karate áratugum saman og ekki verið í felum, heldur fyrir allra augum eins og Fryhoff sagði.