Margir sérfræðingar telja þetta geta verið vísbendingu um að ákveðið hafi verið að dóttirin verði taki við af föður sínum þegar dagar hans eru taldir.
Hún heitir Ju-ae og er talin vera níu eða tíu ára en það veit enginn utan innsta valdahringsins í Norður-Kóreu. AP segir að líklega sé hún næst elsta barn einræðisherrans.
Ju-ae birtist umheiminum í fyrsta sinn fyrir rúmri viku þegar hún var viðstödd þegar langdrægu flugskeyti var skotið á loft. Þar leiddi hún föður sinn fram hjá flugskeytinu sem var skotið á loft frá flugvelli í höfuðborginni Pyongyang.
Í gær birtist hún síðan í annað sinn. Þá fylgdi hún föður sínum til fundar við flugskeytasérfræðinga, tæknimenn, embættismenn og aðra sem komu að þrón Hwasong-17 flugskeytisins.
Ríkisfréttastofan KCNA segir dótturina vera „mest elskaða barn“ leiðtogans og birti myndir af feðginunum.
En það vekur athygli að móðir Ju-ae og eiginkona Kim Jong-un, Ri Sol-ju, er ekki á myndunum.
Ankit Panda, hjá Carnegie friðarstofnuninni, segir að það sem er að gerast núna í Norður-Kóreu sé mjög sérstakt. Myndirnar styrki hugmyndir um að verið sé að koma Ju-ae fyrir sem arftaka föður síns. Hún sagðist ekki telja það tilviljun að fyrstu myndirnar af henni hafi verið teknar í tengslum við tilraunir með flugskeyti sem geta borið kjarnaodda.
Norska ríkisútvarpið segir að sérfræðingar velti nú fyrir sér hvort leiðtoginn hafi gengið fram hjá elsta barni sínu og valið Ju-ae sem arftaka. Ef það er rétt þá brýtur hann gegn hefðum Kim-fjölskyldunnar þar sem elsta barnið tekur við af föður sínum.
Kim Jong-un er þriðji ættliðurinn sem er við völd í landinu á þeim rúmu 70 árum sem eru liðin síðan það varð til. Faðir hans og afi, sem stofnaði landið, stýrðu því með harðri hendi og núverandi leiðtogi hefur ekki verið neinn eftirbátur þeirra hvað varðar harðstjórn og grimmd.
