„Ég vona að þið takið mark á kvörtununum og takið tillit til að ekki eru allir sáttir við að sjá líkama annarra og að í framtíðinni verðið þið nægilega klæddar þegar þið eruð á svölunum.“ Eitthvað á þessa leið hljóðaði bréfið sem vinkonunum barst frá leigufélaginu.
Þær hafa búið í íbúðinni í rúmlega þrjú ár. Hún er með svalir sem snúa inn í garðinn og það sama á við um aðrar íbúðir í húsinu. Þegar sólin skín fara Salka og Sofie í sólbað á svölunum og eru berar að ofan. Það kom þeim því á óvart þegar þær fengu bréfið því Danir eru almennt þekktir fyrir frjálslyndi og nekt þykir ekki mikið tiltökumál.
TV2 segir að íbúar í fjórum íbúðum hafi kvartað undan sólböðum þeirra og sagt að þeim þyki óþægilegt að þær séu berar að ofan í sólbaði.
Í kjölfar bréfsins birtu þær færslu um það á Instagram og lesandabréf í Politiken og í kjölfarið fóru danskir fjölmiðlar að fjalla um málið.
Vinkonurnar vita ekki hverjir kvörtuðu en telja ólíklegt að það sé fólk sem býr í sama stigagangi og þær því svalir þess séu fyrir ofan eða neðan þeirra svalir og því sjái það ekki inn á svalirnar.
Þær ætla að halda áfram að stunda sólböð á svölunum berar að ofan. Í kjölfar umfjöllunar fjölmiðla báðust stjórnendur leigufélagsins afsökunar á bréfinu og sögðu að vinkonurnar hafi ekki gert neitt rangt. Ástæðan er sú að í Danmörku eru reglur um kynlíf og nekt á almannafæri ansi rúmar og er fólki í raun heimilt að vera nakið hvar sem er á almannafæri, svo lengi sem það misbýður ekki öðru fólki og aðeins er um nekt að ræða, ekkert kynferðislegt. Þetta má ráða af bréfi sem dómsmálaráðuneytið sendi öllum lögregluumdæmum landsins 1975 og er enn í gildi.
