Um 400 kóalabirnir verða bólusettir gegn klamýdíu á næstunni í Ástralíu. Vísindamenn segjast vonast til að þetta geti leikið stórt hlutverk í að tryggja að tegundin lifi áfram.

Klamýdía, sem smitast við kynmök, hefur breiðst mjög út meðal kóalabjarna og á sumum svæðum er helmingur dýranna smitaður.

„Þetta er slæmur sjúkdómur sem veldur augnslímhúðarbólgu, blöðrubólgu og jafnvel ófrjósemi,“ sagði Amber Gillett, dýralæknir og stjórnandi tilraunarinnar, í tilkynningu sem var send út áður en bólusetningar hófust.

Vísindamenn segja að sjúkdómurinn, sem getur einnig smitast frá mæðrum til afkvæma þeirra við fæðingu, geti einnig valdið blindu.

Birnirnir fá einn skammt af bóluefni og örflögur verða settar í þá áður en þeim verður sleppt aftur út í náttúruna.

Vísindamennirnir ætla að rannsaka hversu mikla vernd bóluefnið veitir dýrunum. Þeir vonast til að bóluefnið muni fjölga þeim dýrum sem lifa og ýta undir fjölgun þeirra.

CNN segir að erfitt sé að áætla fjölda kóalabjarna í Ástralíu og sé fjöldinn mjög breytilegur á milli svæða. Í rannsókn, sem vísindamenn við University of Queensland gerðu 2016, komust þeir að þeirri niðurstöðu að 330.000 dýr væru eftir í Ástralíu.

Rannsókn á vegum World Wildlife Fund leiddi í ljós að rúmlega 60.000 kóalabirnir hafi drepist í gróðureldunum miklu 2019 og 2020.