Yfirvöld í Singapore hafa heimilað sölu á kjöti sem er ræktað en ekki fengið með því að slátra dýrum. Margir hafa fagnað þessu og segja um stór tímamót að ræða fyrir kjötiðnaðinn. Um er að ræða „kjúklingabita“ sem eru framleiddir af bandaríska fyrirtækinu Eat Just.

Fyrirtækið segir að samþykktin geti hugsanlega opnað dyr framtíðarinnar þar sem allt kjöt verður framleitt án þess að slátra þurfi dýrum, kjötið verði einfaldlega ræktað. The Guardian skýrir frá þessu. Þannig að í framtíðinni verða kannski stórar verksmiðjur þar sem kjötframleiðsla fer fram án þess að einu einasta dýri sé slátrað.

Tugir fyrirtækja vinna að þróun „ræktaðs kjöts“ og er þar um að ræða kjúklinga, nautakjöt og svínakjöt. Þetta gæti gjörbylt kjötframleiðslu sem hefur mikil áhrif á umhverfið og loftslagið. Ekki má gleyma að þetta getur einnig orðið til þess að fólk hafi aðgang að heilbrigðara kjöti þar sem engin lyf hafa komið við sögu og ekki þarf að hafa áhyggjur af dýravernd og illri meðferð á dýrum.

Á hverjum degi er um 130 milljónum kjúklinga slátrað til matar og 4 milljónum svína. Búpeningur er 60% af heildarþyngd allra spendýra á jörðinni, 36% erum við mennirnir en villt dýr eru aðeins 4%.