Spænskir fjölmiðlar hafa greint frá því að maður hafi þurft á verulegri læknishjálp að halda vegna stungusára á höfði, hálsi og í klofi. Kona, sem er fyrrverandi kærasta mannsins, hefur verið handtekin, grunuð um verknaðinn, en markmið hennar á að hafa verið að skera eistun af manninum.

Umrædd árás á að hafa átt sér stað í bænum Alcudia, sem er á Mallorca-eyju. Bærinn er mörgum Íslendingum vel kunnugur, en þangað hafa margir farið í sólarlandaferðir.

Á spítala á maðurinn síðan að hafa haldið því fram að kona sem hann var með í „óformlegu sambandi“ hafi framið árásina. Hún hafi beðið hann um að koma til að hitta sig á stóru bílastæði. Þar hafi þau byrjað að stunda kynlíf sem hafi endað með þessum ósköpum.

Í spænskum fjölmiðlum hefur konunni verið lýst sem afbrýðisamri fyrrverandi kærustu, en ekkert gefið upp um hana nema að hún sé af kólumbískum ættum. Ástæðan fyrir þessari afbrýðisemi á að byggjast á því að hún hafi séð manninn á börum, þar sem hann blandaði geði við aðrar konur.

Þá kemur fram að lögregla hafi komist að þeirri niðurstöðu að hún hafi reynt að skera af honum eistun með hnífi. Þegar hann hafi farið að verja sig, hafi hún stungið hann tvisvar, þá í höfuð og háls. Maðurinn er síðan sagður hafa flúið í matvörubúð. Þar hafi hann kallað á hjálp og lögregla kölluð til sem hafi handtekið konuna. Lögregla hafi svo lagt hald á tvo hnífa sem voru í förum konunnar, annar er talinn hafa verið notaður í árásinni.

Konunni hefur verið sleppt úr fangelsi gegn tryggingu. Þá er maðurinn enn á spítala að jafna sig.