Yfirvöld í Texas í Bandaríkjunum vara fólk við mjög hættulegri amöbu í vatni í og við Brazoriasýslu. Aðvörunin var send út eftir að sex ára drengur lést eftir að heilaétandi amaba hafði tekið sér bólfestu í heila hans. Fleiri amöbur þessarar tegundar fundust síðan í vatnsbóli í sýslunni.

Drengurinn, Josiah McIntyre, lést þann 8. september af völdum sýkingar sem amaban orsakaði. Hún lifir í hlýjum vötnum og ám og sundlaugum sem eru illa þrifnar. Hún kemst inn í líkamann í gegnum nasirnar og fer í heilann. Hún veldur miklum höfuðverk, hita, stífum hnakka og uppköstum. Því næst tekur svimi við, mikil þreyta, fólk verður ringlað og sér ofsjónir.

Rannsókn leiddi í ljós ummerki eftir amöbuna í garðslöngu á heimili Josiah og í gosbrunni í bænum og í brunahana.

Afi hans og amma segja að hann gæti hafa komist í snertingu við skítugt vatn þegar hann var að leik í vatnsgarði í Lake Jackson skömmu áður en hann veiktist. Garðinum hefur verið lokað og íbúum í sýslunni er ráðlagt að sjóða allt neysluvatn.