Í lok september 2010 var Larry Ray, sem nú er sextugur að aldri, látinn laus úr fangelsi. Hann var þá heimilislaus og greip því til þess ráðs að flytja inn á heimavist úrvalsháskólans Sarah Lawrence College í New York en þar bjó dóttir hans. Hann var nýlega handtekinn grunaður um margvísleg brot á þeim tíma sem hann bjó á heimavistinni.

New York Times skýrir frá þessu. Brotin beindust að stúlkunum sem bjuggu á heimavistinni. Ray er grunaður um að hafa blekkt þær og nýtt sér ungan aldur þeirra til að stjórna þeim.  Hann er meðal annars sagður hafa þvingað eina þeirra til að stunda vændi. Hann beitti þær einnig kynferðislegu ofbeldi og andlegu ofbeldi auk margvíslegs líkamlegs ofbeldis.

Hann er grunaður um að hafa neytt stúlkurnar til að láta sig fá sem svarar til um 100 milljóna íslenskra króna.

Ray er þekktur í undirheimum New York og hefur verið viðriðinn ýmiskonar glæpastarfsemi undanfarna áratugi.