Eigandi sumarhúss í Odsherred á Sjálandi í Danmörku tók nýlega eftir því að óvenjulega mikil rafmagnsnotkun var í sumarhúsi hans þrátt fyrir að enginn dvelji þar yfir veturinn. Hann hafði því samband við lögregluna sem fór á vettvang og komst fljótt að af hverju rafmagnsnotkunin var svona mikil.

51 árs heimilislaus maður hafði tekið sér búsetu í bústaðnum í óleyfi. Hann hafði búið þar í um viku þegar lögregluna bar að garði. Hann hafði ekki valdið neinu tjóni en líklegt þykir að hann hafi komist inn í gegnum ólæstar dyr.

Honum var vísað á brott og á hann ákæru yfir höfði sér. Í versta falli getur hann fengið sex mánaða fangelsisdóm.