Á miðvikudag í síðustu viku var sendiferðabíl stolið í Lørenskog í Noregi. Það er eitt og sér ekki í frásögur færandi en það sem gerir málið frásagnarvert er að í bílnum voru 25 grömm af blásýru. Blásýra er baneitruð og dugir þetta magn til að drepa 125 manns. Efnið átti að fara til Oslóarháskóla þar sem nota átti það við rannsóknir.

Blásýran er frá Sigma-Aldrich sem er í eigu lyfjafyrirtækisins Merck. Málið er litið mjög alvarlegum augum og lögreglan hefur lagt mikla vinnu í að reyna að hafa uppi á sendiferðabílnum en án árangurs.

Það þarf aðeins 0,2 grömm af blásýru til að verða manneskju að bana.

Lögreglan útilokar ekki að bílþjófurinn hafi losað sig við blásýruna og hefur beðið fólk um að vera á varðbergi og tilkynna strax til lögreglunnar ef það telur sig hafa fundið efnið.