65 ára bandarískur maður lést á fimmtudaginn á heimili sínu í Van Buren í Maine í Bandaríkjunum eftir að hann gekk í eigin gildru. Hann hafði sett skammbyssu upp á heimili sínu sem gildru. Svo virðist sem hann hafi gleymt þessu og gengið beint í gildruna og orðið fyrir skoti úr skammbyssunni.

ABC News skýrir frá þessu. Gildran var þannig úr garði gerð að byssan átti að hleypa skoti af á alla þá sem komu inn um aðaldyrnar. Þegar lögreglumenn komu á vettvang fundu þeir margar álíka gildrur sem maðurinn hafði sett upp í húsinu.

Ekki tókst að bjarga lífi mannsins og lést hann á vettvangi. Ekki er vitað af hverju maðurinn setti gildrurnar upp.