Myndin, sem fylgir þessari grein, var tekin nýlega af danska loftslagssérfræðingnum Steffen Olsen þegar hann var við störf á Grænlandi. Myndin hefur vakið mikla athygli en hún sýnir vel hversu alvarlegar og víðtækar loftslagsbreytingarnar eru og þau miklu áhrif sem þær hafa á svo viðkvæmt svæði sem Grænland er.

Á myndinni sjást sleðahundar draga sleða yfir ísbreiðu sem er hulin vatni. Myndin var tekin í Inglefield Bredning firði en það er eitt þeirra svæða þar sem hitinn var mun hærri en venja er. Ísinn, undir vatninu, var aðeins 1,2 metrar á þykkt þegar myndin var tekin.

Margir vísindamenn hafa lýst yfir áhyggjum af sívaxandi bráðnun íss á Grænlandi og þeim áhrifum sem það getur haft um allan heim en reikna má með að yfirborð sjávar hækki töluvert af þeim sökum.

Bráðnunartímabilið á Grænlandi hófst óvenjulega snemma þetta árið vegna hlýrra vinda sem hafa leikið um landið. Ísinn, sem sést á myndi Olfsen, væri ekki farinn að bráðna á þessum árstíma við eðlilegar aðstæður.