Skotárásir hafa verið tíðar í bandarískum skólum á síðustu árum og hefur lögregla ekki haft undan við að bregðast við fölskum tilkynningum um yfirvofandi árásir að undanförnu. Þetta virðist hafa færst í vöxt og segir Chitwood að lögregla hafi eytt gríðarlegum fjármunum og tíma í að rannsaka hótanir sem ekki reyndist fótur fyrir.
Nú hefur Chitwood ákveðið að bregðast við þessu og ætlar hann að birta opinberlega myndir af hverjum þeim sem lögregla handtekur í tengslum við slík mál og skiptir þá engu máli hversu gamall viðkomandi er. Varaði Chitwood foreldra við því að ef börn þeirra gerast sek um afbrot af þessu tagi verði þau nafn- og myndbirt.
„Ef þið viljið ekki ala upp börnin ykkar þá skal ég gera það,“ sagði lögreglustjórinn og bætti við að foreldrar gætu átt von á því að sjá myndir af börnunum sínum á samfélagsmiðlum ef þeir tala ekki um fyrir þeim.
Chitwood tilkynnti þetta í myndbandi í kjölfar handtöku á 11 ára pilti sem hafði hótað að gera skotárás í skólanum sínum. Lögregla lagði hald á hnífa og leikfangabyssur við rannsókn málsins en í yfirheyrslu sagði drengurinn að hann hefði bara verið að grínast. Hafði hann sýnt samnemendum sínum „vopnasafn“ sitt og útbúið lista yfir nöfn þeirra einstaklinga sem hann vildi ná.
Óhætt er að segja að ákvörðun Chitwood hafi vakið athygli en hann segist vera í fullum rétti að birta myndir og nöfn þeirra barna sem handtekin eru. Þeir sem fagna ákvörðuninni hafa sumir kallað eftir því að foreldrar umræddra barna verði einnig nafn- og myndbirtir. Aðrir segja það varasamt að setja ellefu ára börn í gapastokkinn og benda á að foreldrar þeirra ættu frekar að sæta ábyrgð.
