Sprengingin sem varð minnst 47 einstaklingum að bana í austurhluta Kína í gær var gríðarlega öflug. Til marks um það sprungu rúður í húsum í sex kílómetra radíus frá verksmiðjunni þar sem sprengingin varð.
Um var að ræða efnaverksmiðju í borginni Yancheng, sem er norður af Sjanghæ. Verksmiðjan hafði verið til skoðunar vegna vandamála sem tengdust öryggismálum. Ekki liggur fyrir hvað olli sprengingunni. Hundruð særðust, þar af 90 alvarlega.
Á myndböndum sem kínverskir fjölmiðlar hafa birt má sjá ótrúlegar skemmdir eftir sprenginguna sem mældist vel á jarðskjálftamælum. Um 900 slökkviliðsmenn voru kallaðir á vettvang til að reyna að slökkva eldinn sem kom upp í kjölfarið.
Íbúi í þorpinu Chenjiagang, um fjórum kílómetrum frá verksmiðjunni, segir að margir í þorpinu hafi orðið fyrir meiðslum. Rúður brotnuðu í húsum og áttu íbúar fótum sínum fjör að launa undan glerbrotinu rigndi yfir þá.
Ekki liggur fyrir hvort einhver hafi verið handtekinn í tengslum við málið, en grunur leikur á að vanræksla af einhverju tagi eigi hlut að máli. Í eftirliti Vinnueftirlitsins í verksmiðjunni í febrúar í fyrra voru gerðar fjölmargar athugasemdir í sambandi við öryggismál.