Sérfræðingar segja fulla ástæðu til að hafa áhyggjur af banvænum sjúkdómi, „uppvakninga-sjúkdómi, sem hefur breiðst út meðal hjartardýra í Bandaríkjunum og Kanada undanfarið. Hann hefur nú greinst í dýrum í 24 ríkjum í Bandaríkjunum og tveimur héruðum í Kanada. Sérfræðingar óttast að sjúkdómurinn geti borist í fólk.

DV skýrði frá sjúkdómnum fyrr í vikunni. Fram kom að sjúkdómurinn hefur einnig greinst hjá hjartardýrum í Noregi. Fox News segir að hvorki sé hægt að bólusetja gegn honum né lækna hann.

Í síðustu viku varaði Michael Osterholm, hjá Minnesota háskóla, þingmenn og yfirvöld við hættunni sem stafar af sjúkdómnum, sem nefnist CWD. Hann segir að það þurfi að takast á við hann eins og lýðheilsusjúkdóm því hætt sé við að hann geti borist í menn innan fárra ára. Ekki er vitað til að fólk hafi smitast af honum enn sem komið er.

Osterholm segir að líklega muni sjúkdómurinn berast í fólk þegar það borðar sýkt kjöt.

„Hugsanlega mun mikill fjöldi fólks smitast og að ekki verði um einöngruð tilfelli að ræða.“

Sagði hann í samtali við Twin Cities Pioneer Press og bætti við:

„Ef Stephen King myndi skrifa skáldsögu um smitsjúkdóm myndi hann skrifa efni eins og þetta.“

Ástæðan fyrir að sjúkdómurinn er oft nefndur „uppvakningasjúkdómur“ er að einkenni hans líkjast þeim sem uppvakningar í kvikmyndum og sjónvarpsþáttum sýna. Þar á meðal eru slef, stirt göngulag, skortur á samhæfingu, hræðast ekki fólk, árásargirni og dofi.