Í júní 2015 hvarf 36 ára Norðmaður, Ole Geir Hodne Viste, á dularfullan hátt og hefur ekkert spurst til hans síðan. Nú telur lögreglan hugsanlegt að hann sé fundinn. Á fimmtudaginn fundu byggingaverkamenn lík inni í vegg í húsi í Sandnes. Talið er að líkið hafi verið þar í mörg ár. Á líkinu fannst greiðslukort með nafni Ole Geir.

Ekki hefur þó enn verið skorið endanlega úr um hvort líkið er af Ole Geir. Greiðslukortið var síðast notað í Stavangri þann 16. júní 2015. Vitni telja sig síðan hafa séð Ole Geir í Sandnes daginn eftir. En þar hurfu öll spor eftir hann.

Slys eða morð?

Lögreglan bíður enn eftir niðurstöðum krufningar en hún fór fram á föstudaginn. Af þeim sökum er ekki búið að skera endanlega úr um hvort um Ole Geir sé að ræða.

Norska ríkisútvarpið segir að kringumstæður á vettvangi geri að verkum að lögreglan geti ekki útilokað að viðkomandi hafi dottið niður um holrúm á loftinu og setið fastur inni í veggnum. En hún hefur heldur ekki útilokað að maðurinn hafi verið myrtur og líkinu komið fyrir inni í veggnum.

Húsið hefur staðið autt í 7-8 ár.