Kína og Filippseyjar hafa um langa hríð deilt um yfirráð í Suður-Kínahafi en Filippseyingum, og fleirum, þykir Kínverjar vera ansi frekir til fjárins þar. Nú hafa deilurnar stigmagnast enn frekar eftir að kínverskir hermenn tóku yfir litla umdeilda eyju.

Talsmenn Hvíta hússins segja aðgerðir Kínverjar vera „mikið áhyggjuefni“ ef rétt sé að þeir hafi tekið eyjuna á sitt vald.

BBC skýrir frá þessu og segir að bæði Kína og Filippseyjar hafi gert tilkall til eyjunnar og fleiri eyja í eyjuþyrpingunni Spratly Islands.

Það er ljósmynd af fjórum svartklæddum kínverskum hermönnum, sem halda á kínverska fánanum, á eyjunni Sandy Cay í Spratly Islands eyjaklasanum sem hefur hrist upp í fólki.

Sandy Cay er um 200 fermetrar að stærð og er nærri filippseyskri herstöð.

Kínverska ríkissjónvarpsstöðin CCTV segir að frá því byrjun apríl hafi Kínverjar „haldið uppi eftirliti á sjó og framfylgt fullveldislögsögu sinni á svæðinu“.

Þetta fer illa í Filippseyinga og ekki síst vegna þess að hin  nálæga herstöð þeirra er notuð til að fylgjast með hreyfingum Kínverja í Suður-Kínahafi.