Sannleikurinn er stundum ótrúlegri en skáldskapur og það átti svo sannarlega við í tilviki manns sem fékk fimmtán bjóra frá læknum sem enduðu á að bjarga lífi hans. Newsweek fjallar um þetta sérkennilega mál.
Forsaga málsins er sú að víetnamskur karlmaður á besta aldri, Nguyen Van Nhat, var fluttur á sjúkrahús í Quant Tri-héraði þann 25. desember síðastliðinn vegna heiftarlegrar áfengiseitrunar. Maðurinn hafði drukkið metanól, einnig þekkt sem tréspíri eða viðarspíri, og var alkóhólmagnið í blóði hans ríflega þúsundfalt á við það sem talið er öruggt.
Metanól er ekki það sama og etanól þó bæði efnasamböndin séu alkóhól. Etanólið er það efnasamband sem finna má í áfengum neysluvörum en metanólið ekki.
Nguyen var meðvitundarlaus þegar hann var fluttur á sjúkrahúsið og brugðu læknar á það ráð að gefa honum sem nemur einum bjór á hverjum klukkutíma – alls 15 stykki. Til að gera langa sögu stutta var þetta gert til að takmarka það magn metanóls sem lifrin brýtur niður. Við niðurbrotið myndast svokölluð maurasýra sem getur valdið hættulegri eitrun, hálfum til einum sólarhringi eftir neyslu metanólsins. Afleiðingarnar geta verið lífshættulegar og einnig valdið blindu.
Í umfjöllun Newsweek kemur fram að etanólið stöðvi eða seinki oxun metanóls í formaldehýð sem aftur oxast í maurasýruna hættulegu. Með þessu tókst læknum að kaupa sér tíma sem þeir nýttu til að framkvæma blóðskilun. Þremur vikum eftir innlögn var Ngueyn útskrifaður af sjúkrahúsi og er hann við ágæta heilsu þrátt fyrir allt sem á undan er gengið.