Lögreglan í Marokkó fann lík tveggja norrænna kvenna í bænum Imlil í gær. Önnur konan er frá Danmörku en hin frá Noregi. Samkvæmt frétt Morocco World News voru líkin með áverka eftir hnífsstungur. Lögreglan telur að konurnar hafi verið myrtar.

Imlil er um 10 kílómetra frá Mount Toubkal sem er hæsta fjall Norður-Afríku og er í Atlasfjöllum.

Norsku og dönsku sendiráðin í Marokkó vinna nú saman að því að afla nánari upplýsinga um málið. Þau hafa staðfest að hafa fengið tilkynningu um lát kvennanna. Það gerir upplýsingaöflun erfiða að Imlil er afskekktur bær og samband þangað er að sögn stopult.