Fornleifafræðingar hafa fundið teikningu sem er talin vera elsta teikning sem fundist hefur fram að þessu. Teikningin er frá steinöld og er 30.000 árum eldri en elstu teikningarnar sem höfðu áður fundist. Þetta bendir til að forfeður okkar hafi notað málningu mun fyrr en talið hefur verið.

Teikningin er ekki neitt stórkostlegt og flókið listaverk. Hér er um að ræða línur á steini sem líkjast helst myllumerki eins og er mikið notað í dag á netinu. En þetta myllumerki er 73.000 ára gamalt og því mun eldra en internetið. Steinninn fannst í Suður-Afríku.

Vísindagrein um steininn hefur verið birt í hinu virta vísindariti Nature að sögn videnskab.dk.

Christopher Henshilwood, hjá háskólanum í Bergen, vann að rannsókninni. Hann sagðist hafa verið fullur efasemda í upphafi um teikninguna því hann hafi talið að þarna gæti alveg eins verið um náttúruleg strik að ræða á steininum. Þegar í ljós kom að þarna var um mannaverk að ræða hafi allt breyst því þetta sé ævaforn vitnisburður um geymslu upplýsinga utan mannsheilans.

Ekki er vitað hvaða þýðingu myllumerkið hafði fyrir þann sem teiknaði það en eflaust hefur það haft einhverja þýðingu fyrir viðkomandi.