Vísindamenn hafa lengi talið að hafsvæðið norðan við Grænland væri það hafsvæði þar sem hafís myndi lengst standast loftslagsbreytingarnar. En nú hefur ísinn í Pólhafinu, norðan við Grænland, brotnað upp og skilið eftir opið haf alveg upp að ströndinni. Það eru vindáttir sem ýta hafís upp að Grænlandi og Kanada. Þetta veldur því að ísinn verður þykkari og gamall ís safnast upp. Af þessum sökum hafa vísindamenn talið að ísinn myndi halda velli lengi vel í Pólhafinu.

„Við höfum alltaf talið að svæðið norðan við Grænland myndi vera einhverskonar athvarf fyrir ísinn, hann myndi verða þar.“

Hefur BBC eftir Walt Meier, hjá bandarísku ís- og snjóstofnuninni (NSIDC).

Í sumar opnaðist tug kílómetra breitt sund á svæðinu þegar ísinn lét undan. Vindur ýtti ísnum á brott frá ströndinni og út í Pólhafið og því hefur myndast íslaust svæði norðan við Grænland þar sem þykkur ís ætti að vera til staðar.

Þetta er í annað skipti á þessu ári sem þetta gerist en aldrei áður hefur þetta gerst tvisvar á einu ári síðan mælingar með gervihnöttum hófust á áttunda áratugnum segir í umfjöllun The Guardian. Í febrúar var sama staða uppi en það var í fyrsta sinn sem hafsvæðið var íslaust að vetri til en það hafði áður gerst nokkrum sinnum að sumri til.

Ísinn norðan við Grænland hefur þynnst í kjölfar hlýrra sumra og því hreyfir vindurinn hann auðveldlega úr stað.