„Eitt af því sem er svo magnað í kirkjunni er allar þær stundir sem brúa kynslóðarbilið,“ segir Jóna Hrönn Bolladóttir prestur í Garðabænum.
Flesta sunnudaga þegar horft er yfir kirkjuskipið er fólk á aldrinum 1-90 ára á staðnum. Allt byggist upp á einingu og rými fyrir alla óháð aldri. Það eiga allir heilsufarshópar og aldurshópar að eiga sinn stað í safnaðarstarfinu.
Vorhátið Vídalínskirkju er eitt af þeim verkefnum sem sameinar kynslóðirnar, en hún verður nú haldin 12.maí kl.11-13 í Vídalínskirkju.
„Það er uppskeruhátíð þar sem barna- og unglingakórar kirkjunnar stíga fram og láta ljós sitt skína en þeim stjórna hjónin Jóhanna Guðrún Jónsdóttir og Davíð Sigurgeirsson, en hann stýrir líka hljómsveit hússins sem stígur á stokk. Þá verður einnig frumsýnt nýtt myndband með barnakórnum.
TTT hópurinn eru krakkar á aldrinum 10-12 ára sem hafa gert stuttmynd sem þau frumsýna á vorhátíðinni en það eru guðfræðineminn Matthildur Bjarnadóttir og kennaraneminn Jóna Þórdís Eggertsdóttir sem leiða það skemmtilega starf.
Sirkus Íslands mun svo senda til okkar frábæra fjöllistamenn,“ segir Jóna Hrönn og bætir við „en þau hafa komið til okkar síðustu þrjú árin og gera gríðarlega vel.“
„Það eru foreldra barnanna í barnakórnum sem grilla pylsur ofan í alla enda sterkur og góður hópur. Svo fáum við lánaða hoppukastala frá KFUM/K í Reykjavík sem slá alltaf í gegn hjá yngstu kynslóðinni,“ segir Jóna Hrönn að lokum og vonast eftir blíðviðri um miðjan maí.