Gunnar Smári Egilsson, fyrrverandi leiðtogi Sósíalistaflokksins og núverandi ritstjóri Samstöðvarinnar, hugleiðir meiðyrðamál vegna ummæla í hans garð af hálfu nýrrar stjórnar flokksins.

Gunnar Smári deilir frétt Vísis þar sem byggt er á tölvupósti sem ný stjórn hefur sent á flokksfélaga, þar er fráfarandi stjórn sökuð um að hyggjast tæma sjóði flokksins og reka nýja stjórn hans út úr húsnæði flokksins í Bolholti. Í fréttinni segir:

„Ný stjórn Sósíalistaflokks Íslands hefur sent tölvupóst til félaga þar sem fullyrt er að fyrrverandi framkvæmdastjórn flokksins hyggist tæma algerlega sjóði flokksins og hlaupa með þá burt. Einnig vilji hún rukka nýja stjórn afturvirkt um endurreiknað markaðsverð leigu fyrir húsnæði flokksins, og krefjist þess að ný stjórn rými húsnæðið fyrir 15. júlí næstkomandi.

Í tölvupóstinum sem vísað er þess krafist að peningum sem teknir hafi verið í óleyfi af reikningum flokksins eftir aðalfund verði skilað.

Þvæla og ofstopi

Gunnar Smári segir á Facebook-síðu sinni að árásir á sig séu komnar út í slíka „þvælu og ofstopa“ að hann hugleiði meiðyrðamál. Orðrétt skrifar hann:

„Fólk hefur spurt mig undanfarið hvers vegna ég stefni ekki þessu fólki fyrir meiðyrði sem hefur skáldað upp alls kyns þvælu um mig á undanförnum mánuðum, í stjórnlausri rógsherferð sem það magnaði upp til að narra fólk til að ganga í Sósíalistaflokkinn til að kjósa sig í stjórnir. Ég hef bandað því frá mér, sagt að meiðyrðamál séu kostnaðarsöm erindisleysa. En þetta er komið út í slíka þvælu og ofstopa að ég ætla að sofa á þessum ábendingum.“