56 ára kona er í haldi lögreglu vegna gruns um að hafa ráðið þeim bana, en þau látnu voru eiginmaður og dóttir konunnar. Konan var flutt á sjúkrahús eftir atvikið þar sem hún var sjálf með áverka eftir eggvopn.
Fjölskyldan sem um ræðir var frönsk en hafði búið í Dublin á Írlandi í um tíu ár.
Blaðamaður Irish Times er staddur hér á landi og ræddi hann meðal annars við Ævar Pálma Pálmason, aðstoðaryfirlögregluþjón miðlægrar rannsóknardeildar lögreglu.
Í frétt miðilsins í morgun kemur fram að íslenska lögreglan hafi unnið náið með írsku lögreglunni og hafa aðstandendur fjölskyldunnar verið upplýstir um málið.
„Næstu skref eru að halda áfram að safna gögnum og upplýsingum og vinna með frönskum og írskum yfirvöldum,“ er haft eftir Ævari Pálma.
Blaðið hefur eftir heimildarmanni sem þekkir til rannsóknarinnar að lögregla hafi lagt hald á hníf sem nú er til rannsóknar, en grunur leikur á að hann hafi verið notaður við voðaverkið.
Þá kemur fram að einn þáttur rannsóknarinnar snúi að því að ráðist hafi verið á feðginin á meðan þau sváfu.
Dublin Live segir frá því að fjölskyldan hafi komið til Íslands þann 7. júní síðastliðinn og áttu þau bókað flug heim síðastliðinn laugardag, 14. júní, eða sama dag og feðginin fundust látin. Mun það hafa verið starfsmaður á hótelinu sem hafði samband við lögreglu umræddan morgun.
