Þeir þrír flokkar sem mynduðu síðustu ríkisstjórn töpuðu samanlagt rúmum 182 milljónum króna á milli ára vegna lélegs árangurs í síðustu Alþingiskosningum. Flokkarnir sem mynda hina nýju ríkisstjórn græða samtals 124,4 milljónir á milli ára. Alls hefur ríkissjóður greitt stjórnmálaflokkum tæpa 9 milljarða króna í árlega styrki sem hafa verið veittir frá árinu 2007.
Þetta kemur fram í svari Þorbjargar Sigríðar Gunnlaugsdóttur dómsmálaráðherra við fyrirspurn Árna Helgasonar, varaþingmanns Sjálfstæðisflokksins sem situr nú á þingi.
Sést þar svart á hvítu hversu miklum fjármunum flokkarnir þrír sem mynduðu síðustu ríkisstjórn töpuðu. Mest töpuðu Vinstri græn, sem fengu rúmar 87 milljónir króna árið 2024 en lentu undir 2,5 prósent markinu í kosningunum og hurfu þar með af fjárlögum.
Auk þess að vera stjórnmálalegt áfall fyrir flokkinn, sem leitt hafði ríkisstjórn í mörg ár, var þetta fjárhagsleg katastrófa. Vinstri græn hafa fengið vel yfir milljarð króna í árleg framlög. Frá árinu 2007 hefur flokkurinn fengið samtals 1.209.403.873 krónur.
Næst mest tapaði Framsóknarflokkurinn, elsti stjórnmálaflokkur landsins. Enda beið hann afhroð í kosningunum og þurrkaðist út á höfuðborgarsvæðinu. Flokkurinn fór úr 115,5 milljónum í 56,4 milljónir króna á milli ára. En það er tap upp á rúmlega 59 milljónir.
Framsóknarflokkurinn er í þriðja sæti yfir þá flokka sem hafa fengið mest framlög frá árinu 2007. Samanlagt hefur hann fengið 1.302.908.227 krónur.
Af ríkisstjórnarflokkunum sem mynduðu síðustu ríkisstjórn kom Sjálfstæðisflokkurinn skást út úr kosningunum. Tap hans í peningunum var hins vegar tæpar 36 milljónir króna á milli ára. Það er fór úr 158,1 milljón í 122,3.
Þó það eigi ekki við núna þá hefur Sjálfstæðisflokkurinn yfirleitt verið stærsti flokkurinn á þingi og þar af leiðandi hefur hann fengið mesta árlega styrki úr ríkissjóði. Í heildina nema þeir 2.295.431.674 krónum eða rúmlega fjórðungur af öllum styrkjum.
Þrátt fyrir að vera ekki í ríkisstjórn fengu Píratar útreið í Alþingiskosningunum og féllu út af þingi. Hann slefaði hins vegar yfir 2,5 prósenta múrinn og komst því á fjárlög ársins 2025. Engu að síður tapar hann 46,5 milljónum króna, fer úr 63,7 í 17,2 milljónir.
Píratar eru sá flokkur sem hefur fengið mest heildarframlög án þess að eiga nokkurn tímann sæti í ríkisstjórn. Það er 576.420.016 krónur frá árinu 2014.
Minnst var tapið hjá Sósíalistaflokknum, enda úr lægstum söðli að falla þar sem flokkurinn hefur aldrei átt sæti á Alþingi. Framlög lækka úr 25,5 milljónum í 22,6, eða um tæpar 3 milljónir.
Sósíalistar hafa fengið 98.685.557 krónur frá árinu 2022.
Þá er komið að sigurvegurunum, bæði í þingstyrk og beinhörðum peningum. Allir ríkisstjórnarflokkarnir þrír unnu sigra og Samfylkingin, flokkur forsætisráðherra, varð stærsti flokkur landsins. Jukust styrkir flokksins úr 71,5 milljónum króna í 130,2 á milli ára. Það er aukning um tæpar 59 milljónir.
Samfylkingin hefur rokkað upp og niður frá árinu 2007 og minnstu munaði að flokkurinn hyrfi af þingi eftir kosningarnar árið 2016. Engu að síður er Samfylkingin sá flokkur sem hefur fengið næst hæstu styrkina frá árinu 2007, það er 1.498.822.632 krónur.
Viðreisn er mun skammlífari flokkur en engu að síður flokkur sem var hætt kominn að falla út af þingi á tímabili. Flokkurinn hefur aldrei haft jafn mikinn þingstyrk og nú og framlög til hans jukust úr 61,9 milljón króna í 102,1, eða um rúmar 40 milljónir.
Þetta er níunda árið sem Viðreisn fær styrki frá ríkissjóði. Í heildina hefur flokkurinn fengið 531.119.539 krónur frá árinu 2017.
Þriðji ríkisstjórnarflokkurinn, Flokkur fólksins, vann einnig góðan sigur í Alþingiskosningunum og er til að mynda stærsti flokkurinn í Suðurkjördæmi. Flokkurinn fékk 65 milljónir króna í fyrra en mun fá 90,5 milljónir í ár. Það er aukning um 25,5 milljónir króna á milli ára.
Flokkur fólksins komst inn fyrir fjárlagaþröskuldinn eftir sínar fyrstu kosninga árið 2016 þrátt fyrir að hafa ekki náð þá manni inn. Allar götur síðan hefur flokkurinn bætt við sig fylgi, þingmönnum og krónum. Heildarframlög eru 513.861.728 krónur frá árinu 2017.
Miðflokkurinn bætti við sig í síðustu Alþingiskosningum en hafnaði engu að síður utan ríkisstjórnar. Aukningin í peningum var rúmar 36 milljónir króna, það er fór úr 44,6 í 80,9 milljónir sem var reyndar minna en margir höfðu gert ráð fyrir.
Líkt og Píratar hefur Miðflokkurinn fengið um hálfan milljarð króna í styrki án þess að sitja nokkurn tímann í ríkisstjórn. Heildarframlög eru 535.267.827 krónur frá árinu 2018.
Fleiri flokkar hafa fengið árlega styrki úr ríkissjóði, bæði flokkar sem hafa náð mönnum kjörnum á þing og ekki. Einn af þeim átti meira að segja sæti í skammlífri ríkisstjórn. Eru þeir eftirfarandi.
Björt framtíð: 93.061.168 krónur árin 2014 til 2017.
Borgarahreyfingin: 90.932.678 krónur árin 2010 til 2013.
Frjálslyndi flokkurinn: 77.194.925 krónur árin 2007 til 2009.
Dögun: 27.097.053 krónur árin 2014 til 2016.
Flokkur heimilanna: 26.412.107 krónur árin 2014 til 2016.
Íslandshreyfingin: 24.281.020 krónur árin 2008 til 2009.
