Breska ríkisútvarpið BBC hefur verið dæmt fyrir meiðyrði gagnvart Gerry Adams, fyrrverandi leiðtoga stjórnmálaflokksins Sinn Fein. Í heimildarmynd á vegum stöðvarinnar var Adams sagður hafa heimilað morð á uppljóstrara.

Breska blaðið The Guardian greinir frá þessu.

Dómstóll í Dublin, höfuðborg Írlands, dæmdi BBC til að greiða Adams 100 þúsund evrur, eða rúmar 14 milljónir króna, í miskabætur. Það er eftir réttarhöld sem stóðu yfir í fjórar vikur.

Málið nær reyndar miklu lengur aftur í tímann. Það er til ársins 2016 þegar því var haldið fram í þættinum BBC Spotlight að Adams hafi árið 2006, sem þáverandi leiðtogi Sinn Fein og þingmaður í Belfast, hafa samþykkt að maður að nafni Denis Donaldson sem veitti bresku leyniþjónustunni MI5 upplýsingar yrði myrtur.

Donaldson, sem var meðlimur í Sinn Fein, fannst skotinn í sumarbústað í apríl þetta ár eftir að hafa viðurkennt að hafa matað lögregluna og MI5 af upplýsingum. Í þættinum kom fram að ónefndur maður sem kallaður var „Martin“ hafi haldið þessu fram um Adams.

Í vörn sinni sögðu lögmenn BBC að þetta hefði ekki verið sett fram sem staðreynd og að fleiri en téður Martin hefðu haldið þessu fram. Lögmenn Adams sögðu hins vegar að fréttamennska BBC væri háskaleg og meiðandi fyrir hann.

Adams var leiðtogi Sinn Fein, pólitíska arms írska lýðveldishersins (IRA), í 35 ár. Þetta er ekki í eina skiptið sem hann hefur verið sakaður um að heimila eða fyrirskipa morð. Árið 2010 var hann til dæmis sakaður um að hafa fyrirskipað morð á ekkju og tíu barna móður árið 1972. Adams hætti sem leiðtogi Sinn Fein árið 2018.