Erlendir fréttamiðlar greina nú frá ótrúlegum ásökunum í garð rússnesku leyniþjónustunnar sem minna helst á kvikmyndahandrit. Því er haldið fram að rússneska leyniþjónustan hafi freistað þess að ná tangarhaldi á auðkýfingnum Elon Musk með markvissum hætti og með því að nota kynlíf og fíkniefni.

Fyrrverandi starfsmaður alríkislögreglunnar FBI, leyniþjónustumaðurinn Jonathan Buma, segir að rússneska leyniþjónustan hafi haldið úti sérstökum aðgerðum til að ná tökum á tæknirisum í Síkilkondalnum. Þessar aðgerðir hafi náð til auðkýfinga á borð við Elon Musk sem og athafnamannsins Peter Thiel. Hluti af þessum aðgerðum var að njósna um þessa aðila, til að finna einhverjar upplýsingar sem hægt væri að nota til að kúga þessa aðila til samvinnu og hlýðni.

Meðal annars hafi rússneska leyniþjónustan séð sér leik á hendi þar sem Musk væri mjög veikur fyrir „lauslátum konum og fíkniefnaneyslu, einkum ketamíni,“ sagði Buma í nýlegri heimildarmynd þýsku sjónvarpsstöðvarinnar ZDF. Musk hafi til dæmis verið hrifinn af eyðimerkurreifinu Burning Man, klámefni og fjárhættuspili. Þetta hafi Rússar séð sem höggstað á ríkasta manni heims.

Því er eins haldið fram að Musk hafi átt í beinum samskiptum við forseta Rússlands, Vladimir Pútín, síðan að minnsta kosti 2022, ef ekki fyrr.

Buma starfaði í 16 ár við gagnnjósnir fyrir FBI, en hann var handtekinn í mars og ákærður fyrir brot á þagnarskyldu er hann deildi ríkisleyndarmálum með útgáfufyrirtæki. Buma gengur nú laus gegn tryggingu.

Buma segir við ZDF að hann hafi ekki heimild til að upplýsa hvernig FBI komst yfir þessar upplýsingar sem greinir frá hér að ofan en fullyrðir þó að það séu ríkar sannanir fyrir sannleiksgildi þeirra.