Hópur unglinga hefur verið að hrella íbúa á Vallahverfinu að undanförnu. Berja þeir á hurðir og taka myndbönd af því fyrir samfélagsmiðla, íbúum til mikillar ógnar og armæðu. Sams konar mál kom upp í Vesturbænum fyrir nokkrum árum.
„Mig langar að vekja athygli á mjög óþægilegu og truflandi athæfi sem hefur átt sér stað við heimili mitt frá og með föstudegi. Þá hófst það að þessir unglings strákar hafa verið að koma að húsinu mínu og slamma á útidyrahurðina með miklu afli og hlaupa frá á hverju kvöldi milli kl 20:00-22:00 sem er óþolandi,“ segir kona sem býr á Völlunum í íbúagrúbbu hverfisins á samfélagsmiðlum.
Segir hún að þetta gerist oft á kvöldin og stundum nokkrum sinnum í röð. Þetta valdi henni og fjölskyldu hennar miklu ónæði.
„Þetta er bæði ógnvekjandi og ókurteisi, og það er mikilvægt að foreldrar og forráðamenn séu meðvitaðir um hvað börnin þeirra eru að gera í hverfinu,“ segir konan. Biður hún um að þetta hætti strax og óskar eftir því að fólk sem þekki til piltanna hafi samband við foreldra þeirra. Ef þetta haldi áfram muni hún neyðast til þess að tilkynna málið til lögreglunnar.
Konan er langt frá því að vera sú eina sem lent hafi í hópnum. Fleiri greina frá því að hafa lent í þessum piltum, eða að minnsta kosti einhverjum sem hafa komið og barið á dyrnar.
„Voru hér hjá okkur í gærkvöldi, frekar óþægilegt,“ segir ein kona. „Hef verið að lenda i þessu líka nokkrum sinnum !“ segir maður. Hafi þetta verið að gerast á Eskivöllum, Drekavöllum, Berjavöllum og víðar. Er fólk hvatt til að hringja í lögregluna.
„Þeir eru einnig að taka þetta upp, stóðu um daginn 2 af þeim niðri á plani að horfa með símana á lofti. Vonandi sjá foreldra þeirra þetta því þetta er ansi mikið ónæði,“ segir einn maður.
Þetta er ekki í fyrsta sinn sem unglingar halda heilu hverfunum í herkví með hegðun sinni. Það sama gerðist til að mynda í Vesturbæ Reykjavíkur og á Seltjarnarnesi haustið 2021 eins og greint var frá í fjölmiðlum.
Líkt og nú þá vöktu unglingar ótta og óhug íbúa með því að berja á hurðir og glugga húsa. Einn lýsti hljóðunum eins og verið væri að brjótast inn hjá sér.
Einn íbúi á Seltjarnarnesi sagði hóp krakka næstum hafa brotið rúðu í forstofunni hjá sér með barningi sínum. Tíu ára dóttir hans þori varla að vera heima hjá sér eftir atvikið.
