Skúli Helgason, borgarfulltrúi Samfylkingar í Reykjavík, hélt upp á sextugsafmælið sitt með tónleikum í Iðnó þann 10. apríl síðastliðinn. Söfnuðust 3,4 milljónir króna fyrir Geðhjálp.

Þetta kemur fram í tilkynningu samtakanna.

„Uppselt var á tónleikana og sóttu þá um 300 manns. Allur ágóði af tónleikahaldinu rann í Styrktarsjóð geðheilbrigðis auk þess sem safnað var framlögum frá bakhjörlum og fyrirtækjum. Niðurstaðan var sú að 3,4 milljónir króna söfnuðust í tengslum við framtakið,“ segir í tilkynningunni.

Á tónleikunum komu fram listamennirnir Mugison, GDRN, Ragga Gísla ásamt hljómsveit, Emmsjé Gauti, Inspector Spacetime og Ra:tio.

Mætti Skúli á skrifstofu Geðhjálpar í gær og færði Svövu Arnardóttur, formanni samtakanna og stjórnar styrktarsjóðsins, afrakstur framtaksins.

„Fjárhæðin mun nýtast til að styrkja verkefni einstaklinga, frjálsra félagasamtaka og stofnana sem tengjast eflingu geðheilbrigðis barna og ungmenna á Íslandi,“ segir í tilkynningunni.