Eins og alþjóð veit lést Frans páfi á annan í páskum, 88 ára að aldri og hafa helstu fjölmiðlar heims fjallað ítarlega um lífshlaup hans. Frans páfi hét fullu nafni Jorge Mario Bergoglio og fæddist í Argentínu en var af ítölsku bergi brotinn.

Áður en hann gekk veg trúarinnar starfaði hann hins vegar sem útkastari á næturklúbb sem er kannski ekki beint páfalegasta starf sögunnar. Hann starfaði einnig sem húsvörður þar til að hann lærði til prests innan kaþólsku kirkjunnar og reis svo til æðstu metorða innan hennar.

Þá var hann ákafur áhugamaður um tangódans, eins og sæmir Argentínumanni, og ástríðufullur stuðningsmaður San Lorenzo-fótboltaliðsins í heimalandinu.

Áður en hinn ungi Jorge Mario gekk trúnni á hönd var hann yfir sig ástfanginn af argentínskri stúlku, Amaliu Damonte. Foreldrar þeirra beggja voru þó ekki ánægðir með ráðahaginn en það stöðvaði Jorge Mario ekki í því að biðja um hönd Amalíu. „Ef ég get ekki gifst þér þá gerist ég prestur,“ á Jorge Mario að hafa sagt og þannig var það sennilega gæfa kaþólsku kirkjunnar að Amalía sagði nei.

Frans páfi verður borinn til grafar laugardaginn 26. apríl næstkomandi og fljótlega eftir það hefst nýtt páfakjör.