Mál málanna í íslensku samfélagi undanfarna daga hefur verið afsögn Ásthildar Lóu Þórsdóttur úr embætti mennta- og barnamálaráðherra vegna sambands hennar og í kjölfarið barneignar með 16 ára pilti þegar hún var sjálf 22 ára, fyrir 35-36 árum Sitt hefur hverjum sýnst í umræðum um málið og um hvernig forystukonur ríkisstjórnarinnar, sérstaklega Kristrún Frostadóttir forsætisráðherra, héldu á málinu. Borið hefur töluvert á ásökunum um að liðsmenn Sjálfstæðisflokksins standi á bak við það að upplýsingum um málið var komið til fjölmiðla. Sú staðreynd að fyrrum tengdamóðir þessa barnsföður Ásthildar Lóu, sem hafði upphaflega samband við forsætisráðuneytið vegna málsins, hefði sent Áslaugu Örnu Sigurbjörnsdóttur þingmanni Sjálfstæðisflokksins tölvupóst hefur gefið slíkum vangaveltum byr undir báða vængi. Össur Skarphéðinsson fyrrum formaður Samfylkingarinnar gerði þetta að umtalsefni í Facebook-færslu nú um helgina en í athugasemd við færsluna boðar Jón Gunnarsson þingmaður Sjálfstæðisflokksins frekari afhjúpanir um gömul hneykslismál liðsmanna stjórnarflokkanna. Starfsmaður Morgunblaðsins líkar við athugasemdina.
Í færslunni veltir Össur því fyrir sér hvort ekki væri réttast að rannsaka þátt Áslaugar Örnu:
„Það var forystu Sjálfstæðisflokksins til minnkunar að freista þess að nota þetta mál til að sverta mannorð forsætisráðherra. Sérstaklega þegar haft er í huga að skv. RÚV hafði fallin erfðaprinsessa í flokknum upplýsingar um málið. Ætlar RÚV virkilega ekki að ganga eftir því að Áslaug Árna skýri stöðu sína í málinu? Eftir ásakanir úr Sjálfstæðisflokknum um að forsætisráðherra sé ábyrg fyrir lekum af erindi sem henni barst er það skýlaus krafa að Áslaug Arna geri hreint fyrir sínum dyrum. Hvað gerði hún við þær upplýsingar sem henni bárust um málið?“
Áslaug Arna þvertók alfarið fyrir að hafa á nokkurn hátt komið að málinu að öðru leyti en því að hafa fengið tölvupóst frá tengdamóðurinni fyrrverandi þar sem hún hafi óskað eftir því að fá að ræða mál við hana sem tengdust Ásthildi Lóu. Áslaug Arna sagðist ekki hafa nokkurn tímann haft samband við konuna og þar af leiðandi aldrei verið í neinum samskiptum við fjölmiðla vegna málsins.
Áslaug Arna svarar fyrir sig í tengdamóðurmálinu – „Flestir sjá í gegnum samsæriskenningar“
Í athugasemd við áðurnefnda færslu Össurar gefur Jón Gunnarsson þingmaður Sjálfstæðisflokksins því hins vegar hressilega undir fótinn að Sjálfstæðismenn muni stuðla að því að fleiri beinagrindur stjórnarliða verði opinberaðar. Skjáskot af athugasemd Jóns má sjá hér fyrir neðan:
Athygli vekur að meðal þeirra sem líka við athugasemd Jóns er Stefán Einar Stefánsson þáttastjórnandi hjá Morgunblaðinu, sem er einnig virkur þátttakandi í starfi Sjálfstæðisflokksins.
Það var Samstöðin sem greindi fyrst frá athugasemd Jóns.
