Ein af sérstæðari fréttum síðasta sumars snerist um Kjarnaskóg á Akureyri og hinar ódauðlegu finnsku sögupersónur, Múmínálfana. Skógræktarfélag Eyjarfjarðar lét þá útbúa þar sérstakan Múmínlund en bað ekki rétthafa verkanna um leyfi.
DV greindi frá málinu þann 27. júní síðasta sumar:
Haft var samband við Ingólf Jóhannsson, framkvæmdastjóra Skógræktarfélags Akureyrar, í gær og hann spurður út í málið. Hann undraðist að einhver teldi að sækja þyrfti um leyfi fyrir framtak af þessu tagi. „Ég kem svo sem af fjöllum hvað þetta varðar,“ sagði Ingólfur og vafðist honum tunga um tönn um stund. Hann sagði síðan:
„En fyrstu viðbrögð eru að þetta eru leiktæki sem erlent fyrirtæki framleiðir og selur og þessi leiktæki, sem eru CE-vottuð, eru í notkun út um öll Norðurlönd, þar sem fólk er að setja þetta upp. Við höfum kannski haft í huga að gera þessu hærra undir höfði og auglýsa þetta sem Múmíngarð. Ég hef í sjálfu sér ekki heimildir fyrir því að það sé löglegt og leyfilegt. Varðandi leiksvæðið sem slíkt þá á ég erfitt með að trúa því að þetta sé ólöglegt.“
Félagið Moomin Characters fer með höfundarrétt yfir Múmínálfunum. Í samtali við DV sagði starfsmaður félagsins engan vafa leika á því að um höfundarréttarbrot væri að ræða.
„Þetta er því miður blygðunarlaust höfundarréttarbrot gagnvart Moomin Characters. Lögmenn okkar eru í þessum skrifuðu orðum að undirbúa lögsókn á hendur hinum brotlegu.“
Ekki varð þó af lögsókn því Skógræktarfélagið gerði breytingar á Múmínlundinum áður en rétthafarnir fóru í hart. Snorkstelpan var fjarlægð úr Kjarnaskógi og Múmínlundurinn breytti um nafn, varð Ævintýralundur.
