Foktjón varð á Ísafirði í nótt vegna veðurs. Lausir munir fuku og ollu tjóni á mannlausum bílum. Veggklæðning af Stjórnsýsluhúsinu losnaði og fauk á bíla.

Einnig fuku til lausamunir í Skutulsfirði. Í tilkynningu frá Lögreglunni á Vestjörðum segir:

„Í nótt urðu vakthafandi lögreglumenn varir við að nokkrir lausir munir höfðu fokið og a m k í tveimur tilvikum urðu skemmdir á mannlausum bifreiðum sem stóðu í bifreiðastæði við Hafnarstræti á Ísafirði. En veggglæðning af Stjórnsýsluhúsinu hafði losnað og fokið á bifreiðarnar.

Á nokkrum öðrum stöðum í Skutulsfirði fuku lausir hlutir til og var reynt að tryggja að þeir yllu ekki frekara tjóni.

Þá urðu lögreglumenn varir við að landfestar báts við bryggju á Ísafirði voru að losna. Haft var samband við skipstjórann og var hægt að fyrirbyggja frekari skemmdir.

Lögreglan vill hvetja til þess að húseigendur/umráðamenn og aðrir hugi vel að því hvort eitthvað í nærumhverfinu geti losnað og fokið með tilheyrandi hættu fyrir vegfarendur eða valdið skemmdum á eigum annarra.

Nýbyggingar eða mannvirki sem eru í viðgerð, s.s. þak eða veggglæðningar virðast vera í hættu hvað þetta varðar, að hlutir losni og fjúki.

Áfram er spáð hvössum vindi af og til næstu daga.

Þá eru vegfarendur sem leið eiga um vegi undir bröttum hlíðum hvattir til að aka með sérstakri varúð, enda hafa grjót fallið á vegi og erfitt er að sjá það í myrkrinu.“