Tíu indverskum ferðamönnum var bjargað inn í hlýjuna í nærri tíu gráðu frosti í Svarfaðardal á þriðjudagskvöld. Ferðamennirnir voru vanbúnir og bíllinn þeirra hafði endað í skurði.
Greint er frá þessu á samfélagsmiðlinum Reddit. Það er notandi sem kallar sig JP Dueholm sem kom köldu ferðalöngunum til bjargar og gaf þeim heita fiskisúpu að borða.
Segir hann að það sé ekki óalgengt að ferðamenn banki upp á, til að spyrja til vegar eða þvíumlíkt. En á þriðjudag bankaði fimm manna hópur frá Indlandi í miklum vandræðum upp á.
„Þau höfðu verið að elta norðurljósin síðustu daga án mikillar velgengni og enduðu í dalnum okkar, niður langan malarveg,“ segir hann. „En okkar malarvegur, rétt eins og flestir aðrir, breytast í hreina ísbreiðu við þessar veðuraðstæður og annar bíllinn með fimm manns hafði lent í skurði.“
Ferðamennirnir voru ískaldir og voru algjörlega vanbúnir fyrir veðrið. Það er ekki í vetrarskóm, með húfur eða vettlinga þrátt fyrir að úti væri 9 stiga frost.
„Einn blessaður náunginn var ekki í neinum sokkum,“ segir hann. En sá hafði gefið þá vinkonu sinni sem hafði týnt sínum við að komast upp úr snjóskafli.
Var ferðalöngunum boðið inn til að hlýja sér og kallað var á aðstoð frá verkstæði til að losa bílinn. Á meðan beðið var eftir bílnum var elduð fiskisúpa með tómat og ferskjum.
„Þetta reyndust vera nemendur víðs vegar frá Indlandi, flest þeirra höfðu aldrei kynnst hitastigi undir frostmarki áður. Þau voru alls ekki vön kuldanum, en hins vegar gátu þau sagt sögur af hitabylgjum svo heitum að ekki var hægt að fara út fyrir hússins dyr, sem er eitthvað sem ekki gerist á Íslandi,“ segir hann.
Þegar búið var að losa bílinn og sameina alla í hópnum gerðist svo það ótrúlega. Himnarnir settu á svið sýningu.
„Það var heiðskírt úti og móðir náttúra ákvað að gefa okkur norðurljósasýningu sem ég held að þau munu aldrei gleyma,“ segir hann.
Eftir matinn og uppvaskið héldu ferðamennirnir loks af stað út í myrkrið alsælir og gleyma því sjálfsagt ekki að búa sig betur undir kuldann næst.
