Maðurinn, sem var 49 ára, var á gangi yfir Reykjanesbraut norðan gatnamóta Breiðholtsbrautar/Nýbýlavegar þegar slysið varð.
Á sama tíma var Nissan Pathfinder-bifreið ekið norðaustur Reykjanesbraut og var henni ekið á manninn sem lést í slysinu. Slysið var tilkynnt til lögreglu klukkan 14:42.
Í skýrslunni segir meðal annars:
„Ökumaður Nissan bifreiðarinnar kvaðst hafa verið á leið norður Reykjanesbraut. Hann var nýbúinn að aka undir brúna á vinstri akrein við gatnamót Breiðholtsbrautar/Nýbýlavegar þegar hann varð var við gangandi vegfaranda í vegkantinum austan við Reykjanesbraut. Hann hafi hægt á bifreiðinni þegar hann sá manninn sem þá hafi skyndilega hlaupið út á akbrautina. Hann taldi að vegfarandinn hafi hrasað á leið yfir hægri akreinina en síðan staðið upp og haldið ákveðið áfram en hallandi fram inn á vinstri akreinina í veg fyrir bifreið hans. Að sögn vitnis, sem ók sömu leið, var vegfarandinn á gangi meðfram vegkantinum við hægri akrein og hafi hann farið hratt út á götuna um leið og vitnið ók framhjá honum, hrasað en náð undir sig fótunum en hrasað aftur og dottið í veg fyrir Nissan bifreiðina. Nokkur vitni, sem komu auga á vegfarandann þegar hann var á leið meðfram Breiðholtsbraut í vesturátt, höfðu haft samband við lögreglu fyrir slysið þar sem þau töldu viðkomandi ekki vera í líkamlegu ástandi til þess að vera þarna á ferð meðfram akbraut með háum leyfilegum hámarkshraða og mikilli umferð. Vegfarandinn hafi verið reikull í spori og nokkrum sinnum verið nálægt því að detta inn á Breiðholtsbrautina þegar hann gekk meðfram henni.“
Í skýrslu nefndarinnar er bent á að engar gönguleiðir séu yfir Reykjanesbraut á þessum stað og ekki sé gert ráð fyrir gangandi umferð í þessu umhverfi. Það að maðurinn hafi ekki nýtt nálægar gönguleiðir sem voru til staðar er nefnt sem ein af orsökum slyssins. Önnur orsök hafi verið sú að mikið magn áfengis var í blóði mannsins þegar slysið varð.
