Myndavélabílinn var einnig á ferðinni við grunnskólana í maí og segir lögregla ljóst að ökumenn þurfi að standa sig miklu betur þegar kemur að því að virða leyfðan hámarkshraða.
„Við þessar hraðamælingar í maí og september voru samtals 1.137 ökumenn staðnir að hraðakstri í og við grunnskólana og voru hinir sömu sektaðir fyrir vikið. Í grófasta tilvikinu var um ræða bifreið, sem var ekið á 70 km hraða þar sem leyfður hámarkshraði er 30,“ segir lögregla en gera má ráð fyrir að viðkomandi ökumaður fái sviptingu og háa sekt.
„Um var að ræða alls 38 hraðamælingar og náði vöktunin til 5.048 ökutækja. Brothlutfallið var mishátt, eða lágt, eftir götum en að meðaltali ók rúmlega fimmtungur ökumanna of hratt hverju sinni og það er alls ekki góð niðurstaða,“ segir lögregla.
„Af þessum fyrrnefndu 1.137 ökumönnum voru 984 þeirra staðnir að hraðakstri þar sem leyfður hámarkshraði er 30, en þar var meðalhraði hinna brotlegu 43,5 km/klst. Hinir 153 ökumennirnir óku að meðaltali á 52,5 þar sem er 40 km hámarkshraði og fengu þeir sömuleiðis sekt,“ segir lögregla sem minnir ökumenn að lokum á að aka varlega, ekki síst í námunda við skóla þar sem margir eru á ferli, þar á meðal nýir vegfarendur sem hófu skólagöngu sína í lok sumars.
