Halla Tómasdóttir, forseti Íslands, mun í næsta mánuði taka þátt í ráðstefnu í Bejing í Kína og eiga fund með Xi Jinping, forseta Kína. Hefur Halla upplýst að þau muni meðal annars ræða friðarmál á þessum fundi.
Halla leggur jafnan mikla áherslu á gildi samtalsins og opinna samskipta en framhaldsskólaneminn Daníel Þröstur Pálsson er þó ekki sáttur með væntanlegan fund þjóðarleiðtoganna. Hann lýsir Xi Jinping sem einstaklega grimmum einræðisherra lands þar sem frelsi og lýðræði séu nánast ekki til. Þetta kemur fram í aðsendri grein á Vísir.is.
Lýsir Daníel örlögum Nóbelsverðlaunahafans Liu Xiaobo, sem lét lífið í kínversku fangelsi:
„Eitt dæmi um það er Liu Xiaobo, maður sem fékk friðarverðlaun Nóbels árið 2010 fyrir „langa og friðsama baráttu fyrir grundvallarmannréttindindum í Kína“. En hann tók til dæmis þátt í mótmælunum á torgi hins himneska friðar árið 1989 sem enduðu með því að skriðdrekar voru sendir inn til að rústa þessum friðsömu mótmælum sem leiddi til dauða yfir 2000 mótmælenda. Fékk Liu verðlaun þessi á meðan hann var í fangelsi, þar sem hann svo dó árið 2017. Ekki bara það heldur er Kína undir stjórn Xi í fyrsta sæti yfir fjölda fanga sem teknir eru af lífi og í 3. neðsta sæti lista „Reporters Without Borders“ yfir ritfrelsi.“
Daníel staðhæfir að Kínverjar hafi tekið virkan þátt í innrás Rússa í Úkraínu með stuðningi við stríðsrekstur Rússa. „Þó vissulega er Xi ekki búinn að senda hermenn til að berjast fyrir hönd Rússa í Úkraínu. Þá er hann búinn að senda dróna til Rússlands og fleiri nauðsynlega hluti fyrir stríðsrekstur þeirra. Ekki bara það heldur fór Pútin ásamt Kim Jong Un í heimsókn til Kína fyrr í mánuðinum þar sem Pútín og Xi skrifuðu undir viljayfirlýsingu um að byggja gasleiðslu milli landanna tveggja.“
Á meðan þessu fer fram lýsi Kínaforseti yfir hlutleysi, sem augljóslega standist ekki skoðun.
Daníel lýsir ofsóknum Kínverja gegn þjóðabroti Úigúra í norðvesturhluta Kína:
„Svo er auðvitað Uyghur-fólkið í Xijining, en þar eru yfir milljón Uyghurar í fangabúðum án þess að hafa fengið dóm né ákæru. Og er þetta stærsta fjöldafangelsun þjóðernishópa síðan í seinni heimsstyrjöldinni og hafa lönd eins og Bretland og Litháen fordæmt aðgerðirnar og sagt þær vera þjóðarmorð. En í stað þess að fylgja í fótspor þeirra og fordæma þessa hörmung ætlar Halla að fara í heimsókn og segir hún sjálf að hún sé „full tilhlökkunar“ til að hitta Xi Jinping.“
„Í ljósi þess sem hér hefur verið nefnt er gífurlega erfitt, sorglegt og í raun fáránlegt að sjá forseta Íslands fara í heimsókn til leiðtoga sem getur ekki verið fjær gildum Íslands um frið, lýðræði og frelsi,“ segir Daníel ennfremur og hvetur forsetann til að styrkja fremur tengsl við ríki á borð við Tævan, Japan, Ástralíu og Nýja-Sjáland.
Greinina má lesa hér.
