Þann 13. júlí síðastliðinn átti sér stað alvarlegt atvik í millilandaflugi Turkish Airlines frá Istanbúl til San Francisco. Farþegi um borð fékk einhvers konar aðsvif um borð og varð uppi fótur og fit í vélinni.

Flugvélin var skammt frá Íslandi þegar atvikið átti sér stað og um tíma stóð til að vélin myndi nauðlenda í Keflavík vegna neyðarástandsins samkvæmt flugfréttavefnum Aviation A2Z.

Áður en til þess kom var farþeginn hins vegar úrskurðaður látinn og þá var ákveðið að halda förinni vestur um haf áfram og lenda á Chicago O’Hare-flugvelli sem er einn sá stærsti í Bandaríkjunum.

Lík hins látna var þar flutt frá borði samkvæmt staðfestingu frá Ertugrul Gulsen, stöðvarstjóra Turkish Airlines í Chicago og flutt þaðan í annarri flugvél til San Fransisco.

Í umfjöllun New York Post um málið kemur hins vegar fram að ekkert hafi spurst til líksins síðan og virðist það hreinlega gufað upp. Málið hefði átt að koma inn á borð réttarmeinadeildar Cook-sýslu en þangað barst engin við andlát í áðurnefndu flugi né að lík hafi verið skráð.

Staða málsins er því sú að farþegi lést í háloftunum og enginn veit hvar líkið er niðurkomið.

Andlát í háloftunum eru frekar sjaldgæf en samkvæmt opinberum gögnum koma upp einhverskonar neyðartilvik hjá farþegum í einni af hverjum 600 flugferðum. Í um þremur af 1.000 slíkum tilfellum enda slík neyðartilvik með dauðsfalli.