Áður óbirt myndbönd og myndir eru taldar sýna hversu náið samband Donald Trump við níðinginn Jeffrey Epstein var. Myndefnið staðfestir að Epstein var meðal boðsgesta í brúðkaupi Donald Trump og Mörlu Maples árið 1993. Mæting Epstein í brúðkaupið, sem fór fram á Plaza-hótelinu í New York, hefur hingað til ekki verið á margra vitorði, fullyrðir CNN sem fjallar um málið.
Þá hefur einnig komið fram myndefni frá tískusýningu Victoria Secet í New York árið 1999 þar sem félagarnir sjást í hrókasamræðum og skemmta sér vel.
CNN bar myndefnið undir forsetann sem tók fyrirspurninni óstinnt upp. „Þið hljótið að vera að grínast í mér,“ sagði Trump og lét síðan dæluna ganga um hversu mikil falsfréttamiðill CNN væri. Þá sendi Hvíta húsið frá sér yfirlýsingu þar fréttaflutningurinn var fordæmdur.
Tíðindin þykja óheppileg fyrir Trump sem hefur reynt að gera lítið úr sambandi sínu við níðinginn alræmda, allt frá því að Epstein var handtekinn árið 2019.
Hefur Trump lagt áherslu á það að hann hafði á þeim tímapunkti ekki rætt við Epstein í rúm 15 ár sem allt bendir til að sé rétt. Vinslit urðu milli Epstein og Trump þegar þeir kepptust um sama fasteignaverkefnið á Palm Beach árið 2004.
Þá er ljóst að Trump hefur logið ýmsu til um samband sitt við Epstein. Þannig hefur hann fullyrt að hann hafi aldrei fengið far í flugvélum Epstein þegar hið rétta er að sjö sninnum er nafn hans á farþegaskrá í vél Epstein milli Palm Beach og New York.
Helstu stuðningsmenn Trump eru brjálaðir yfir því að hin svokölluðu Epstein-skjöl hafa ekki verið birt eins og lofað hafði verið. Trump er undir miklum þrýstingi vegna málsins en hið nýja myndefni þykir ýta undir þann möguleika að nafn forsetans sé að finna í skjölunum.
