Derek Huffman, 46 ára gamall fjölskyldufaðir frá Texas í Bandaríkjunum, var gjörsamlega búinn að fá nóg af því sem hann taldi yfirgengilegan vókisma í heimalandi sínu. Kornið sem fyllti mælinn var þegar ein dóttir hans fékk fræðslu um samkynhneigð sambönd í grunnskóla sínum. Þá fékk Derek Huffman nóg.

Hann ákvað því að í samráði við eiginkonu sína, DeAnna, að rífa fjölskylduna upp og flytjast til Rússlands og nýta sér þar sérstakt dvalarleyfi fyrir vestræna þegna sem eiga ekki lengur samleið með þeirri hugmyndafræði sem þar tíðkast.

Hjónin fluttust til bæjarins Istra, skammt frá Moskvu, ásamt þremur dætrum sínum, í byrjun árs og sáu fram á nýtt upphaf. Derek fékk vinnu í rússneska hernum sem járnsuðumaður og sá fram á rólegt líf með fjölskyldunni. En svo fór hins vegar ekki.

Derek var færður yfir í samskiptadeild hersins og nánast um leið var hann sendur á vígstöðvarnar í Úkraínu.

Í umfjöllun Daily Mail um Huffman-fjölskylduna segir Deanna eiginkona hans að Derek hafi verið hent fyrir úlfanna. Hann hafi aðeins fengið lágmarks herþjálfun og síðan sendur af stað. Hann hafi verið sendur skuggalega nærri fremstu víglínu og hún óttist að hann verði farinn að berjast þar innan tíðar.

Þau hafi síðast heyrt í honum í júní þegar hann sendi dætrum sínum skilaboð.

Síðan þá hefur verið þögn.

Fjölskyldan fullyrði að allt sé í lagi með Derek en í umfjöllun Daily Mail kemur fram að um tíma hafi verið myndband á youtube þar sem sjá mátti DeAnna og dætur hennar hágrátandi, með fylgdi texti sem var ákall um hjálp. Myndbandið er hins vegar horfið af streymissíðunni og óljóst hver stóð á bak við það.

Í samtali við Daily Mail segist DeAnne vona hið best en að það hafi sannarlega reynt á að vera ein með þrjú börn í nýju landi.