Lögreglustjórinn á Suðurnesjum hefur staðfest að maður sé í gæsluvarðhaldi grunaður um íkveikju í fjölbýlihúsi að Grænásbraut í Reykjanesbæ þann 13. júlí síðastliðinn.

DV greindi frá málinu í gær. Íbúi í húsinu sem ræddi við DV segir að stórhættulegt ástand hafi skapast en engan hafi sakað. Íbúinn sem grunaður er um íkveikju hafi oft sýnt af sér undarlega hegðun og virðist eiga við drykkjuvandamál að stríða. Hann er sagður hafa játað fyrir öðrum íbúa að hafa hellt bensíni í búð sinni og tendrað eld.

Allir íbúarnir voru komnir út úr húsinu er viðbragðsaðila bar að og engan sakaði. Greiðlega gekk að slökkva eldinn en skemmdir urðu vegna sóts og reyks.

DV sendir fyrirspurn í gær til lögreglustjórans á Suðurnesjum og svar barst í dag frá Öldu Hrönn Jóhannsdóttur, yfirlögfræðingi á lögfræðisviði embættisins. Þar segir:

„Lögreglustjórinn á Suðurnesjum getur staðfest að til rannsóknar er bruni sem átti sér stað í fjölbýli að Grænásbraut, Reykjanesbæ þann 13. júlí sl. Rannsókn málsins lýtur að því hvort um íkveikju hafi verið að ræða.

Einn aðili var úrskurðaður í gæsluvarðhald í þágu rannsóknar málsins þann 14. júlí sl. sem var í dag framlengt til 25. júlí nk.“