Eflaust hélt Donald Trump að hans hörðustu fylgismenn innan MAGA-hreyfingarinnar myndu að lokum sætta sig við þær opinberu skýringar í máli Jeffrey Epstein að ekki væri til nein viðskiptamannaskrá og gögn málsins yrðu ekki opinberuð, eins og lofað hafði verið.
Það virðist hafa verið stórkostlegt vanmat af hans hálfu því harðkjarna MAGA-liðar, þeir sem eru hvað mest ginkeyptir fyrir samsæriskenningum og falsfréttum, eru gjörsamlega trylltir yfir málinu og virðist sumir helst á þeim buxunum að snúast gegn forsetanum.
Trump hefur alltaf matað þennan kjarna af því að hann sé sá utanaðkomandi sem geti barist gegn kerfinu og djúpríkinu en skyndilega er hann orðinn sá sem er að hylma yfir leyndarmál ríkisins. Þetta er ný og flókin staða fyrir Bandaríkjaforseta.
Ætla mætti að Trump sjálfur þekkti það vel hvernig samsæriskenningasmiðir hugsa. Hann hefur sjálfur kynnt undir fjölmargar slíkar sögur og notað þær til persónulegs ávinnings, eins og til að mynda fjaðrafokið út af fæðingarvottorði Barack Obama og fleiri mál.
Trump ætti að þekkja það manna best að þegar ríkið stígur fram og segir fólki að það sé ekkert að frétta og gögn verði ekki gerð opinber. Ekkert kveikir meira í samsæriskenningasmiðum sem vantreysta hinu opinbera.
Forsetinn virðst engu að síður pirraður yfir því hvað Epstein-málið hefur verið fyrirferðarmikið síðustu daga. Telja margir að hann muni setja aukinn kraft í önnur mál til að beina athyglinni þangað.
Líklegt er að það verði innflytjendamálin, sem lengi hafa sameinað MAGA-liða.
