„Af hverju fáum við ekki að vita hvað ríkið er að hafa upp úr heild­sölu tób­aks og smá­sölu áfeng­is? Ástæðan er vænt­an­lega sú að ÁTVR not­ar hagnaðinn af tóbaks­sölu til að niður­greiða Vín­búðina, sem er nokkuð aug­ljóst brot á markaðsráðandi stöðu.“

Þetta segir Arnar Sigurðsson, áfengiskaupmaður í Sante, í viðtali í Morgunblaðinu í dag. Þar er greint frá því að ESA, eftirlitsstofnun EFTA, hafi tekið formlega við kvörtun sem Arnar lagði fram gegn ríkinu vegna einokunar ÁTVR á heildsölu tóbaksvara.

Arnar er ómyrkur í máli og segir að þetta fyrirkomulag sé „gargandi tímaskekkja“ en reikna má með því að ESA taki ákvörðun um málið innan árs.

Í samtali við Morgunblaðið spyr Arnar hvers vegna ríkið sé að reka heildverslun fyrir neysluvörur og bendir hann á að heildsalar flytji inn lyf, matvöru og skotvopn til dæmis.

„Af hverju er ríkið með heild­sölu á tób­aki? Er það vegna þess að ríkið sé svo ábyrg­ur aðili, flink­ur og hag­kvæm­ur? Eða á sala tób­aks að hafa samlegðaráhrif með áfengi? Svarið við þessu öllu er vita­skuld nei. Það er auðvitað út í hött að rík­is­starfs­menn séu að burrast um á lyft­ara uppi á höfða. Svo koma trukk­ar frá Festi, Hög­um og fleir­um og sækja tób­akið,“ segir hann við Morgunblaðið.

Bætir hann við að kvörtunin veki spurningar um það hvort íslenska ríkið sé hugsanlega skaðabótaskylt gagnvart smásöluaðilum sem hafa verið neyddir til að kaupa tóbaksvörur á einokunarverði frá ÁTVR.