Nýnasistinn Tommy Robinson, sem áður leiddi English Defence League, var beðinn að yfirgefa veitingastaðinn Hawksmoor í London á dögunum. Starfsfólkið hafði ekki geð í sér að afgreiða hann og öðrum gestum leið illa vegna nærveru hans.

Breska ríkisútvarpið BBC greinir frá þessu.

Robinson, sem heitir í raun Stephen Yaxley-Lennon, hefur sakað veitingastaðinn, sem er staðsettur við Piccadilly Circus, um mismunun á grundvelli stjórnmálaskoðana og hefur hvatt stuðningsmenn sína til að sniðganga staðinn. En í myndbandi sem birt var á samfélagsmiðlum sést að starfsmaður biður hann og félaga hans um að yfirgefa staðinn þar sem starfsfólkinu líði ekki vel með að afgreiða þá.

Talsmenn Hawksmoor, sem er steikhúsakeðja, hafa hins vegar í yfirlýsingu hafnað því að þetta snúist um stjórnmál. Bæði starfsfólki og öðrum gestum hafi liðið illa vegna viðveru mannanna. Robinson og félagar hans hafi yfirgefið veitingastaðinn á friðsælan máta og veitingastaðurinn vilji ekki taka þátt í stjórnmálaumræðu.