Þar sést eiginkona Stockton Rush, stofnanda Oceangate, heyra hljóð sem bendir til þess að eitthvað hafi farið úrskeiðis neðansjávar þegar kafbáturinn var á leið niður að flaki Titanic. Slysið var í júní 2023 og auk Stockton létust Hamish Harding, Paul Henri Nargeloet, Shahzada Dawood og 19 ára sonur hans, Suleman.
„Hvaða hvellur var þetta?,“ heyrist Wendy Rush, eiginkona Stocktons, segja en hún var um borð í skipi sem fylgdist með ferðalagi Titan niður að flaki Titanic.
Það var breska ríkisútvarpið, BBC, sem birti myndbandið og verður það, ásamt öðrum gögnum úr rannsókn bandarísku strandgæslunnar, birt í heimildarmyndinni Implosion: The Titanic Sub Disaster.
Rannsóknarnefnd strandgæslunnar hefur rannsakað slysið í tvö ár og samkvæmt frétt BBC munu koma fram í myndinni upplýsingar sem ekki hafa áður litið dagsins ljós. Meðal annars að koltrefjarnar sem kafbáturinn var byggður úr voru teknar að brotna niður um ári áður en slysið varð.
Wendy var einnig stjórnarmaður í Oceangate og á myndbandinu sést hún sitja fyrir framan tölvu sem notuð var til að senda og taka á móti skilaboðum frá Titan. Þegar báturinn var kominn niður á um 3.300 metra dýpri heyrist hljóð sem líkist hurð að skella aftur.
Hún hikar, lítur upp og spyr annað starfsfólk hvaða hljóð þetta hafi verið. Stuttu síðar bárust textaskilaboð frá kafbátnum þess efnis að allt væri í lagi sem varð til þess að Wendy hélt að allt gengi samkvæmt áætlun.
Í frétt BBC kemur fram að skilaboðin hafi líklega verið send augnabliki áður en kafbáturinn féll saman og voru þau lengur að berast en hljóðið. Í frétt BBC kemur fram að fulltrúar bandarísku strandgæslunnar segi að hljóðið hafi verið í kafbátnum þegar hann féll saman.
Bent er á það í umfjöllun BBC að sérfræðingar í djúpsjávarrannsóknum og fyrrverandi starfsmenn Oceangate hefðu varað við hönnun Titan. Einn segir að slysið hafi verið „óhjákvæmilegt“ og þá hafi Titan aldrei gengist undir sjálfstæða öryggisúttekt og fengið vottun. Sneru áhyggjurnar aðallega að því að skrokkurinn – meginhluti kafbátsins þar sem farþegarnir sátu – hafi verið úr koltrefjum sem geta verið óáreiðanlegar undir miklum þrýstingi.
