Birgir Örn Guðjónsson, oft kallaður Biggi lögga, er hættur í lögreglunni. Birgir Örn hefur um árabil verið einn þekktasti lögregluþjónn landsins og hefur samfélagsrýni hans, sem hefur meðal annars birst í eftirtektarverðum pistlum, vakið talsverða athygli.

Birgir Örn greinir frá því í pistli á Facebook-síðu sinni að nú sé komið að kaflaskilum á hans ferli og lögreglubúningurinn kominn upp í hillu. Bauðst honum spennandi starf sem hann segist ekki hafa getað hafnað.

„Fyrir rúmum tuttugu árum tók ég skyndiákvörðun að sækja um í lögregluskólann. Ég hafði aldrei haft þann draum um að gerast lögga og það var í raun algjörlega úr mínum karakter, að mér fannst, að fara í slíkt starf. Ég heillaðist engu að síður fljótt af starfinu og þá sérstaklega þeirri hlið að fá tækifæri að hjálpa og hafa áhrif á líf fólks, oft á þeirra erfiðustu tímum í lífinu.“

Hann segir svo frá því að hann hafi alltaf verið mjög forvarnarmiðaður í hugsun og hefur starf hans innan lögreglunnar oftar en ekki litast af því.

„Ég hef meðal annars tekið þátt í allskonar forvarnarverkefnum, bæði hérlendis og erlendis og meðal annars komið að því að gera verklag og þjálfa lögreglumenn víðsvegar um Evrópu. Upp á síðkastið hef ég svo verið rannsóknarlögreglumaður í miðlægri kynferðisbrotadeild. Ástæðan fyrir því að ég valdi þá deild var einnig forvarnarlegs eðlis vegna þess hversu gífurleg áhrif kynferðisbrot hafa oft á líf fólks og framtíð.“

En nú er komið að kaflaskilum.

„Eftir rúm tuttugu ár er löggubúningurinn kominn á hilluna. Mér hefur boðist staða utan lögreglunnar og hef ég nú þegar hafið störf. Þetta er spennandi starf þar sem ég er sannfærður um að reynsla mín komi að gagni auk þess sem það fellur algjörlega að minni hugsjón. Ég hef verið ráðinn sem deildarstjóri hjá Barna og fjölskyldustofu á nýju stuðningsheimili sem við munum opna á næstu mánuðum. Þetta er ótrúlega spennandi starf í gífurlega mikilvægum málaflokki sem hjarta mitt hefur alla tíð slegið fyrir. Sem betur fer er margt í gangi í málaflokknum, enda þörfin mikil, og spennandi tímar framundan. Það eru því bæði forréttindi og áskorun að fá að taka þátt í þeirri uppbyggingu,“ segir hann.

Birgir Örn viðurkennir að það sé skrýtið að fara í annað starf eftir allan þennan tíma innan lögreglunnar, en kveðst þó vera spenntur fyrir komandi tímum.

„Ég er endalaust þakklátur fyrir allt það frábæra fólk sem ég hef unnið með í lögreglunni og ég hlakka til áframhaldandi samstarfs. Það er nefnilega engin stofnun eyland í þessum málaflokki. Farsælt samstarf er lykill.“