Pétur Pétursson prófessor emeritus í guðfræði við Háskóla Íslands kemur séra Friðriki Friðrikssyni til varnar og lýsir efasemdum um að þessi einn þekktasti og áhrifamesti prestur Íslandssögunnar hafi raunverulega brotið kynferðislega gegn drengjum eins og haldið hefur verið fram. Pétur telur líklegt að styttunni af séra Friðrik sem var fjarlægð úr miðborg Reykjavíkur og komið fyrir í geymslu verði komið aftur fyrir á sínum stað. Segir Pétur að séra Friðrik hafi verið öfundaður vegna þess hversu miklum árangri hann náði sem æskulýðsleiðtogi.
Séra Friðrik fæddist 1868 og lést 1961. Hann stofnaði meðal annars KFUM og KFUK á Íslandi og einnig íþróttafélögin Val og Hauka. Hann var áhrifamikill í íslensku samfélagi og helgaði krafta sína einna helst æskulýðsstarfi en þó fremur með drengjum en stúlkum. Í bókinni Séra Friðrik og drengirnir hans eftir Guðmund Magnússon sem kom út 2023 kemur hins vegar fram að Friðrik hafi brotið kynferðislega á drengjum.
Í kjölfarið lét stjórn KFUM og KFUK kanna málið og eftir þá rannsókn gaf stjórnin út yfirlýsingu þar sem kom fram að borist hefðu vitnisburðir um brot séra Friðriks og voru þolendur hans beðnir afsökunar.
Styttan af séra Friðrik, sem bar heitið Séra Friðrik og drengirnir hans og hafði staðið við Lækjargötu frá því á sjötta áratug síðustu aldar, var í kjölfarið fjarlægð.
Þó eru sumir sem hafa lýst efasemdum og telja að ekki hafi verið nægilegar sönnur færðar á sekt hins löngu látna séra Friðriks.
Meðal þeirra er Jón Magnússon lögmaður og fyrrum alþingismaður sem hefur kallað eftir nýrri rannsókn á ásökununum í garð séra Friðriks.
Fyrr í vikunni ritaði síðan séra Valgeir Ástráðsson, fyrrverandi sóknarprestur á Eyrarbakka, grein þar sem hann kom séra Friðrik til varnar.
Séra Valgeir kemur séra Friðriki til varnar – Hann hafði viðurnefnið „Friðrik barnavinurinn“
Pétur Pétursson prófessor emeritus í guðfræði við Háskóla Íslands tekur undir með Jóni um að þörf sé á nýrri rannsókn í málinu.
Þegar áðurnefnd bók Guðmundar Magnússonar kom út lofaði Pétur bókina en sagðist telja að miðað við það sem kæmi fram í henni hefði séra Friðrik ekki farið yfir strikið í samskiptum sínum við drengi.
Í nýrri færslu á samfélagsmiðlum tekur Pétur eins og áður segir undir með Jóni og lýsir einnig eigin rannsóknum á sögu séra Friðriks. Hann segir að á níunda áratug síðustu aldar hafi hann eytt mörgum mánuðum í að kanna heimildir um KFUM og KFUK og séra Friðrik og rætt við marga félagsmenn og aðra sem þekktu hann. Einn þeirra hafi verið sagnfræðingur sem þekkt hafi sögu KFUM af eigin raun. Umræddur maður hafi einu sinni haldið fram þeim orðrómi að séra Friðrik hafi verið samkynhneigður en þegar Pétur hafi spurst frekar fyrir um það og kannað málið hafi ekkert komið út úr því.
Pétur bætir því við að aldrei hafi þessi sagnfræðingur sem þekkti sögu KFUM svo vel ýjað að því að séra Friðrik hefði verið barnaníðingur. Pétur segist oft hafa velt fyrir sér þessum ásökunum í garð séra Friðriks:
„Friðrik innrætti sínu fólki einstaklingshyggju og athafnasemi og sósíalismi var eitur í hans beinum. Margir drengja hans risu úr verkalýðsstétt og erfiðum fjölskylduaðstæðum upp í milli- og borgarastétt og nokkrir komust til áhrifa í Sjálfstæðisflokknum. Friðrik náði meiri árangri sem æskulýðsleiðtogi en aðrir og það hefur skapað öfund auk þess sem menn skildu ekki áhrifamátt hans.“
Pétur segist að lokum telja að styttunni af séra Friðrik verði aftur komið fyrir við Lækjargötu og þar eigi hún heima.
